﻿<center>.92. <br>
əl-Leyl (Gecə) surəsi <br>
<b>(Məkkədə nazil olmuşdur, 21 ayədir) </b><br>
Bismillahir–rəhmanir-rəhim! <br></center>

<ol>
<li>And olsun (aləmi zülmətə) bürüməkdə olan gecəyə; </li>
<br><br><li>And olsun işıqlanmaqda olan gündüzə; </li>
<br><br><li>And olsun kişini və qadını (erkəyi və dişini) yaradana ki, </li>
<br><br><li>Sizin zəhmətiniz (ey insanlar!) cürbəcürdür! (Bəziniz Cənnət üçün, bəziniz isə Cəhənnəm üçün çalışırsınız). </li>
<br><br><li>Kim (malını Allah yolunda) versə, (Allahdan) qorxsa, </li>
<br><br><li>Və ən gözəl sözü (la ilahə illallah kəlməsini) təsdiq etsə, </li>
<br><br><li>Biz ona ən asan olanı (Cənnəti) müyəssər edəcəyik! </li>
<br><br><li>Amma kim (malını Allah yolunda xərcləməyə) xəsislik etsə, (mal-dövlətinə güvənib Allaha) möhtac olmadığını sansa, </li>
<br><br><li>Və ən gözəl sözü (la ilahə illallah kəlməsini) yalan saysa, </li>
<br><br><li>Biz ona ən çətin olanı (Cəhənnəmi) müyəssər edəcəyik (onu Cəhənnəm üçün hazırlayacağıq!) </li>
<br><br><li>(O, Cəhənnəmə) düşəcəyi zaman mal-dövləti ona heç bir fayda verməz. </li>
<br><br><li>Bizim öhdəmizə düşən yalnız doğru yolu göstərməkdir! (Mömin və ya kafir olmaq isə hər kəsin öz işidir). </li>
<br><br><li>Axirət də Bizim, dünya da Bizimdir! </li>
<br><br><li>(Ey insanlar!) Mən sizi alovlanan bir atəşlə qorxutdum. </li>
<br><br><li>Ora ancaq azğın (kafir) daxil olar. </li>
<br><br><li>O kimsə ki, (haqqı) yalan sayar, (imandan) üz döndərər! </li>
<br><br><li>Allahdan qorxub pis əməllərdən çəkinən isə ondan uzaqlaşdırılar (nicat tapar). </li>
<br><br><li>O kimsə ki, malını (Allah yolunda) verib (günahlardan) təmizlənər, </li>
<br><br><li>O şəxsin boynunda heç kəsin bir minnəti (neməti) yoxdur ki, onun əvəzi verilsin (etdiyi yaxşılıq ona əvəz olsun; və ya: o, etdiyi yaxşılıq müqabilində heç kəsdən bir mükafat gözləməz). </li>
<br><br><li>O ancaq ən uca olan Rəbbinin rizasını qazanmaq üçün belə edər. </li>
<br><br><li>And olsun ki, o (öz Rəbbindən Cənnətdə ona verəcəyi nemətlərə görə) razı olacaqdır! </li>
</ol>
