﻿<center>.89. <br>
əl-Fəcr (Dan yeri) surəsi <br>
<b>(Məkkədə nazil olmuşdur, 30 ayədir)</b><br>
Bismillahir–rəhmanir-rəhim! <br></center>

<ol>
<li>And olsun dan yerinə; </li>
<br><br><li>And olsun on gecəyə (zülhiccə ayının birinci, yaxud ramazan ayının sonuncu on gecəsinə); </li>
<br><br><li>And olsun cütə və təkə (tək olan xaliqə, erkək və dişi olmaqla cüt olan məxluqata; cüt olan hər şeyə, yaxud Qurban bayramına və yaxud Ərəfə gününə); </li>
<br><br><li>And olsun keçib getməkdə olan gecəyə (ki, qiyamət haqdır və siz kafirlər qiyamət günü dirilib əməllərinizin cəzasını layiqincə alacaqsınız)! </li>
<br><br><li>Məgər bunlarda (qiyamətin haqq olması barədə) ağıl sahibi üçün and yoxmudur?! </li>
<br><br><li>(Ya Peyğəmbər!) məgər görmədinmi ki, Rəbbin nələr etdi Ada (Hud peyğəmbərin Ad qövmünə)?! </li>
<br><br><li>Sütunlar sahibi (və ya: sütun kimi uca boylu) İrəmə (İrəm camaatına)?! </li>
<br><br><li>(Elə bir qövm ki) məmləkətlər (əhli) arasında onun kimisi yaradılmamışdı. </li>
<br><br><li>(Məgər görmədinmi ki, Rəbbin nələr etdi) vadidə qayaları olan Səmuda (Səmud qövmünə)?! </li>
<br><br><li>Eləcə də saysız-hesabsız ordular sahibi Firona?! </li>
<br><br><li>O kəslər ki, məmləkətlərdə tüğyan edir, </li>
<br><br><li>Oralarda çoxlu fitnə-fəsad törədirlər. </li>
<br><br><li>Nəhayət, Rəbbin onlara əzab qamçısı endirdi. </li>
<br><br><li>Şübhəsiz ki, Rəbbin (bəndələrinin bütün əməllərini) baxıb görür. </li>
<br><br><li>İnsana gəldikdə, nə zaman Rəbbin onu imtahana çəkib ehtiram etsə, ona bir nemət versə, o: “Rəbbim mənə ehtiram göstərdi!” –deyər. </li>
<br><br><li>Amma nə zaman (Rəbbin) onu imtahana çəkib ruzisini əskiltsə: “Rəbbim məni alçaltdı (mənə xor baxdı)!” – söyləyər. </li>
<br><br><li>Xeyr! (Belə deməyin). Doğrusu, siz özünüz yetimə hörmət etmirsiniz (yetimin haqqını vermirsiniz). </li>
<br><br><li>Bir-birinizi yoxsulu yedirtməyə rəğbətləndirmirsiniz. </li>
<br><br><li>Mirası (halal-haramına) varmadan yeyirsiniz (qadınların, uşaqların paylarını vermirsiniz). </li>
<br><br><li>Mal-dövləti isə lap çox sevirsiniz. </li>
<br><br><li>Xeyr! Yer dağılıb parça-parça olacağı; </li>
<br><br><li>Rəbbinin əmri gəlib mələklər səf-səf duracağı </li>
<br><br><li>Və Cəhənnəmin (məhşər meydanına) gətiriləcəyi gün – məhz o gün insan (öz günahlarını) xatırlayacaqdır. Lakin bu xatırlamağın ona nə faydası?! </li>
<br><br><li>O: “Kaş ki, mən əvvəlcədən (axirət) həyatım üçün (yaxşı əməllər) edəydim!” – deyəcəkdir. </li>
<br><br><li>O gün (Allahın) etdiyi əzabı heç kəs edə bilməz! </li>
<br><br><li>(Günahkarları) heç kəs Onun kimi zəncirləyə bilməz! </li>
<br><br><li>(Qiyamət günü Allah-təala mömin kimsəyə belə buyuracaqdır: ) “Ey (öz imanından, əməlindən və Allahın vədindən) xatircəm olan kəs! (Və ya: “Ey arxayın nəfs!”) </li>
<br><br><li>Dön Rəbbinə, sən Ondan razı olaraq, O da səndən! </li>
<br><br><li>(Əməlisaleh) bəndələrimin zümrəsinə daxil ol! </li>
<br><br><li>(Onlarla birlikdə) Cənnətimə varid ol!” </li>
</ol>
