﻿<center>.86. <br>
ət-Tariq (Gecə gələn) surəsi <br>
<b>(Məkkədə nazil olmuşdur, 17 ayədir) </b><br>
Bismillahir–rəhmanir-rəhim! <br></center>

<ol>
<li>And olsun göyə və gecə gələnə! (Gecə peyda olub gündüz qeyb olana!) </li>
<br><br><li>(Ya Peyğəmbər!) Sən nə bilirsən (haradan bilirsən) ki, gecə gələn nədir?! </li>
<br><br><li>(O, zülməti yaran) parlaq ulduzdur! </li>
<br><br><li>Elə bir kimsə yoxdur ki, onun üstündə bir gözətçi (mələk) olmasın! </li>
<br><br><li>Elə isə insan nədən yaradıldığına (bəsirət gözü ilə) bir baxsın! </li>
<br><br><li>O, axıb tökülən bir sudan (nütfədən) yaradılmışdır. </li>
<br><br><li>(O su kişilərin) bel sümüyündən, (qadınların isə) köks sümüyündən çıxar! </li>
<br><br><li>Həqiqətən, (Allah) insanı (öləndən sonra) yenidən diriltməyə qadirdir! - </li>
<br><br><li>Bütün sirlərin aşkar olacağı o qiyamət günü; </li>
<br><br><li>(O gün) insanın nə (əzabı dəf edəcək) bir qüvvəsi, nə də bir köməkçisi olar! </li>
<br><br><li>And olsun yağış sahibi olan göyə; </li>
<br><br><li>And olsun (növbənöv bitkilər yetirmək üçün) yarılan yerə ki, </li>
<br><br><li>Bu (Quran haqla nahaqqı) ayırd edən kəlamdır! </li>
<br><br><li>O, oyun-oyuncaq (əyləncə) deyildir! </li>
<br><br><li>Həqiqətən, (Məkkə müşrikləri Quranın nurunu söndürmək üçün) hiylə qurdular. </li>
<br><br><li>Mən də (hiylələrinə qarşı) onlara cəza verirəm. </li>
<br><br><li>Elə isə (ya Peyğəmbər!) kafirlərə möhlət ver! Onlara azacıq möhlət ver! </li>
</ol>

