﻿<center>.83. <br>
əl-Mutəffifin (Çəkidə və ölçüdə aldadanlar) surəsi <br>
<b>(Məkkədə nazil olmuşdur, 36 ayədir) </b><br>
Bismillahir–rəhmanir-rəhim! <br></center>

<ol>
<li>Vay halına çəkidə və ölçüdə aldadanların! </li>
<br><br><li>O kəslər ki, özlərini insanlardan (bir şey) aldıqları zaman onu tam ölçüb alar, </li>
<br><br><li>Onlar üçün ölçdükdə və ya çəkdikdə isə (onu) əskildərlər. </li>
<br><br><li>Məgər onlar (öləndən sonra) diriləcəklərini düşünmürlərmi?! </li>
<br><br><li>Özü də dəhşətli bir gündə?! </li>
<br><br><li>O gün bütün insanlar (haqq-hesab üçün) aləmlərin Rəbbinin (Allahın) hüzurunda duracaqlar! </li>
<br><br><li>Xeyr! Şübhəsiz ki, pis əməllərə uyanların (kafirlərin) əməl dəftəri (şeytanların əməllərinin yazıldığı və ya Cəhənnəmin ən alt təbəqəsi olan) Siccindədir! </li>
<br><br><li>Sən nə bilirsən (haradan bilirsən) ki, Siccin nədir?! (Və ya: Siccin nədir, bilirsənmi?) </li>
<br><br><li>O, yazılı bir kitabdır! </li>
<br><br><li>O gün vay halına yalan sayanların! </li>
<br><br><li>O kəslər ki, haqq-hesab gününü yalan sayarlar. </li>
<br><br><li>Bunu isə ancaq həddini aşan, günaha batan yalan sayar. </li>
<br><br><li>Ayələrimiz ona oxunduğu zaman: “(Bunlar) qədimlərin əfsanələridir (uydurmalarıdır!)” – deyər. </li>
<br><br><li>Xeyr (belə deyildir). Əslində onların qəlblərini qazandıqları (günahlar) qaplamışdır. </li>
<br><br><li>Xeyr, o gün Rəbbinin mərhəmətindən məhrum olacaqlar! </li>
<br><br><li>Sonra Cəhənnəmə varid qalacaqlar. </li>
<br><br><li>Sonra da onlara: “Bu sizin (dünyada) yalan saydığınız (Cəhənnəmdir)!” deyiləcəkdir. </li>
<br><br><li>Xeyr! (Möminlərlə kafirlər eyni ola bilməzlər). Şübhəsiz ki, yaxşı əməl və itaət sahibi olan möminlərin əməl dəftəri (Allahın ən müxlis bəndələrinin əməlləri yazıldığı və ya Cənnətin ən yüksək mərtəbəsi olan) İlliyyundadır! </li>
<br><br><li>Sən nə bilirsən (haradan bilirsən) ki, İlliyyun nədir?! </li>
<br><br><li>O, yazılı bir kitabdır. </li>
<br><br><li>Onu ancaq (Allaha) yaxın olan mələklər görə bilər! </li>
<br><br><li>Həqiqətən, yaxşı əməl və itaət sahibi olan möminlər Nəim cənnətlərində olacaqlar. </li>
<br><br><li>Onlar taxtlar üstündə (əyləşib Allahın hazır etdiyi nemətlərə) tamaşa edəcəklər. </li>
<br><br><li>Sən (ey Peyğəmbər!) onların üzlərində cənnət sevinci görəcəksən! </li>
<br><br><li>Onlara (gözəl ətirli, təmiz) möhürlü (qablarda olan) şərab (rəhiq) içirdiləcəkdir. </li>
<br><br><li>Onun (içində rəhiq olan qabın) möhürü müşkdür. Qoy yarışanlar onun üçün yarışsınlar! </li>
<br><br><li>Ona təsnim (suyu) qatılmışdır. </li>
<br><br><li>O (təsnim) elə bir çeşmədir ki, ondan (təmiz halda) yalnız (Allaha) yaxın olanlar içər (qalanlara isə o rəhiq şərabına qatılıb verirlər). </li>
<br><br><li>Həqiqətən, günahkarlar iman gətirmiş kimsələrə (dünyada) gülürdülər. </li>
<br><br><li>(Möminlərin) yanlarından keçərkən (onları dolamaq məqsədilə) bir-birinə qaş-göz edirdilər. </li>
<br><br><li>Ailələrinin (yaxın adamlarının) yanına qayıtdıqda isə (onları doladıqları üçün) kefləri kök qayıdırdılar. </li>
<br><br><li>Onlar (möminləri) gördükdə: “Doğrusu, bunlar (haqq yoldan) azanlardır!” – deyirdilər. </li>
<br><br><li>Halbuki onlara (möminlərə) nəzarətçi göndərilməmişdir. </li>
<br><br><li>Bu gün isə möminlər kafirlərə güləcəklər. </li>
<br><br><li>Onlar taxtlar üstündə (əyləşib) baxacaqlar (ki, görsünlər). </li>
<br><br><li>Kafirlər öz əməllərinin cəzasını aldılarmı?! (Əlbəttə, aldılar!) </li>
</ol>
