﻿<center>.81. <br>
ət-Təkvir (Sarınma) surəsi <br>
<b>(Məkkədə nazil olmuşdur, 29 ayədir) </b><br>
Bismillahir–rəhmanir-rəhim! <br></center>

<ol>
<li>Günəş (əmmamə kimi) sarınıb büküləcəyi (sönəcəyi) zaman; </li>
<br><br><li>Ulduzlar (göydən qopub yağış dənələri kimi yerə) səpələnəcəyi zaman; </li>
<br><br><li>Dağlar yerindən qopardılacağı (toz kimi havada uçacağı) zaman; </li>
<br><br><li>(Bədəvi ərəblərin çox əziz tutduğu) boğaz dəvələr başlı-başına buraxılacağı zaman; </li>
<br><br><li>Vəhşi heyvanlar (bir-birindən qisas almaq üçün) bir yerə toplanacağı zaman; </li>
<br><br><li>Dənizlər od tutub yanacağı (və ya dolub daşacağı) zaman; </li>
<br><br><li>Ruhlar (bədənlərə) qovuşacağı zaman; </li>
<br><br><li>Diri-diri torpağa gömülən körpə qızdan: </li>
<br><br><li>“Axı o hansı günaha görə öldürüldü?” soruşulacağı zaman; </li>
<br><br><li>Əməl dəftərləri açılacağı zaman; </li>
<br><br><li>Göy (yerindən) qopardılacağı (və ya büküləcəyi) zaman; </li>
<br><br><li>Cəhənnəm alovlandırılacağı zaman; </li>
<br><br><li>Və Cənnət (möminlərə) yaxınlaşdırılacağı zaman; </li>
<br><br><li>Hər kəs (dünyada bugünkü günə özü üçün yaxşı, pis) nə hazır etdiyini biləcəkdir! </li>
<br><br><li>And içirəm (gecə) yanıb (gündüz) sönən ulduzlara; </li>
<br><br><li>(Günəşlə, ayla) seyr edib (onlar batdığı zaman) gizlənən səyyarələrə (Zühələ, Müştəriyə, Mərrixə, Zöhrəyə və Ütaridə); </li>
<br><br><li>Qaralmaqda olan gecəyə (yaxud: qaralmaqda və çəkilməkdə olan gecəyə) </li>
<br><br><li>Və sökülməkdə olan dan yerinə ki, </li>
<br><br><li>Bu (Quran Allah dərgahında) çox möhtərəm olan bir elçinin (Cəbrailin) gətirdiyi kəlamdır. </li>
<br><br><li>(Elə bir elçi ki) çox qüvvətlidir; ərşin sahibi (Allah) yanında çox hörmətlidir (izzətlidir). </li>
<br><br><li>(Elə bir elçi ki, mələklər arasında) itaət ediləndir, həm də (Allah yanında vəhyə) etibarlı müvəkkildir. </li>
<br><br><li>(Ey Məkkə əhli!) Həqiqətən, sizin dostunuz (müşriklərin dediyi kimi) divanə deyildir! </li>
<br><br><li>And olsun ki, (Peyğəmbər!) onu (Cəbraili) açıq (ən uca) üfüqdə gördü. </li>
<br><br><li>O, qeyb (vəhyi olduğu kimi təbliğ etmək və sizə öyrətmək) barəsində xəsis deyildir. </li>
<br><br><li>O (Quran) da məlun (Allahın rəhmətindən qovulmuş) Şeytanın sözü deyildir. </li>
<br><br><li>Elə isə (siz ondan üz döndərib) hara gedirsiniz? </li>
<br><br><li>O, aləmlər (bütün insanlar və cinlər) üçün ancaq bir öyüd-nəsihətdir. </li>
<br><br><li>Eləcə də sizdən doğru-düz (yolda) olmaq istəyənlər üçün. </li>
<br><br><li>(Onu da bilin ki) aləmlərin Rəbbi olan Allah istəməsə, siz (bunu) istəyə bilməzsiniz! (Yalnız Allah istəsə, istəyə bilərsiniz. Siz insanlar həmişə Allahın qüdrəti, hökmü və iradəsi altındasınız. O sizi bir şeyi istəməyincə siz onu özünüzə istəyə bilməzsiniz. Ona görə də hər işdə Allaha təvəkkül edin!) </li>
</ol>
