﻿<center>.80. <br>
Əbəsə (Qaşqabağını tökdü) surəsi <br>
<b>(Məkkədə nazil olmuşdur, 42 ayədir) </b><br>
Bismillahir–rəhmanir-rəhim! <br></center>

<ol>
<li>(Peyğəmbər) qaşqabağını töküb üzünü çevirdi. </li>
<br><br><li>Yanına korun (Abdullah ibn Ümmi-Məktumun) gəlməsindən dolayı. </li>
<br><br><li>Nə bilirsən, bəlkə də, o (səndən islama dair soruşub öyrənəcəkləri ilə) təmizlənəcəkdir! </li>
<br><br><li>Yaxud öyüd dinləyəcək və bu öyüd ona fayda verəcəkdir! </li>
<br><br><li>(Var dövlətinə güvənib sənin öyüd-nəsihətinə qulaq asmağa) ehtiyac hiss etməyənə (dövlətliyə) gəldikdə, </li>
<br><br><li>Sən üzünü ona tərəf çevirirsən (onun sözünə qulaq asırsan). </li>
<br><br><li>Onun (küfrdən) təmizlənməsindən sənə nə?! </li>
<br><br><li>Yüyürə-yüyürə sənin yanına gələn </li>
<br><br><li>Və (Allahdan) qorxan kimsəyə gəldikdə isə, </li>
<br><br><li>Sən ondan üz çevirirsən! </li>
<br><br><li>Xeyr! (Belə yaramaz, bir daha belə etmə). Həqiqətən, bu (ayələr) bir öyüd-nəsihətdir. </li>
<br><br><li>Kim istəsə, ondan öyüd alar. </li>
<br><br><li>(Bu Quran Allah dərgahında) çox möhtərəm (mötəbər) səhifələrdə - </li>
<br><br><li>(Qədir-qiyməti) yüksək (şanı uca), tərtəmiz səhifələrdədir (Şeytan onlara toxuna bilməz). </li>
<br><br><li>(O, Allahla peyğəmbərlər arasında olan) elçi mələklərin əlləri ilə (lövhi-məhfuzdan köçürülür, yaxud o, elçi mələklərə etibar edilmişdir). </li>
<br><br><li>(O mələklər ki, Allahın yanında) çox möhtərəm, (Allaha) çox mütidirlər. </li>
<br><br><li>Ölsün (kafir) insan! O nə nankordur! </li>
<br><br><li>(Bu təkəbbür onda hardandır? Allah) onu hansı şeydən yaratdı? </li>
<br><br><li>(Allah onu bir qətrə dəyərsiz) nütfədən yaratdı, ona biçim verdi. </li>
<br><br><li>Sonra onun üçün (ana bətnindən çıxış) yolunu asanlaşdırdı. </li>
<br><br><li>Sonra onu öldürüb qəbirə qoydu. </li>
<br><br><li>Sonra da istədiyi vaxt onu dirildəcəkdir. </li>
<br><br><li>Xeyr, (insan Allahın) ona buyurduğunu hələ yerinə yetirməmişdir. </li>
<br><br><li>İnsan hələ bir yeməyinə baxsın! (Görsün ki, ona necə ruzi verdik). </li>
<br><br><li>Həqiqətən, Biz yağışı bol yağdırdıq. </li>
<br><br><li>Sonra yeri gözəl yaratdıq (yaxşı yardıq), </li>
<br><br><li>Belə ki, orada dən (dənli bitkilər) göyərtdik; </li>
<br><br><li>Üzüm və yonca; </li>
<br><br><li>Zeytun və xurma (bağları); </li>
<br><br><li>(Ağacları bir-birinə) sarmaşan bağçalar; </li>
<br><br><li>(Növbənöv) meyvələr və ot (ələf) yetişdirdik. </li>
<br><br><li>(Bütün bunlar) sizin və heyvanlarınızın istifadəsi üçündür! </li>
<br><br><li>Nəhayət, qulaqları kar edən (o dəhşətli səs) gələndə (İsrafil surunu çalanda); </li>
<br><br><li>O gün insan qaçacaq öz qardaşından; </li>
<br><br><li>Anasından, atasından; </li>
<br><br><li>Zövcəsindən və oğullarından! </li>
<br><br><li>O gün onlardan hər birinin istənilən qədər işi olacaqdır! (Hər kəs öz hayında olacaq, heç kəs heç kəsin halından xəbər tutmayacaqdır). </li>
<br><br><li>O gün bir çox üzlər parlayacaq, </li>
<br><br><li>Güləcək, sevinəcəkdir. </li>
<br><br><li>O gün bir çox üzlərə isə toz-torpaq qonacaq, </li>
<br><br><li>Onları zülmət (yaxud his) bürüyəcəkdir. </li>
<br><br><li>Onlar (pis əməllərə uyan) kafirlər, pozğunlardır! </li>
</ol>
