﻿<center>.77. <br>
əl-Mursəlat (Bir-birinin ardınca göndərilənlər) surəsi <br>
<b>(Məkkədə nazil olmuşdur, 50 ayədir) </b><br>
Bismillahir–rəhmanir-rəhim! </center><br>

<ol>
<li>And olsun bir-birinin ardınca göndərilənlərə (mələklərə, peyğəmbərlərə, yaxud küləklərə); </li>
<br><br><li>And olsun şiddətlə əsənlərə (və ya yel kimi tez gedənlərə); </li>
<br><br><li>And olsun (Allahın ayələrini, kitablarını və əmrlərini) yayanlara; </li>
<br><br><li>And olsun (haqla batili) ayıranlara; </li>
<br><br><li>And olsun vəhyi (peyğəmbərlərə) çatdıranlara- </li>
<br><br><li>(Möminlər tövbə edib) üzr diləmək və ya (kafirləri) qorxutmaq üçün (olan vəhyi çatdıranlara) ki, </li>
<br><br><li>Sizə vəd edilən (qiyamət) mütləq vaqe olacaqdır! </li>
<br><br><li>Ulduzlar sönəcəyi; </li>
<br><br><li>Göy yarılacağı; </li>
<br><br><li>Dağlar parça-parça olub dağılacağı (toz kimi havada uçacağı); </li>
<br><br><li>Peyğəmbərlərə (öz ümmətlərinə şahidlik etmək üçün bir qədər) möhlət veriləcəyi zaman, </li>
<br><br><li>(Belə soruşulacaqdır:) “(Bunlara) hansı günə qədər möhlət verilmişdir?” </li>
<br><br><li>(Həmin suala cavab olaraq deyiləcəkdir: ) “(Haqla batili) ayırd ediləcəyi günə qədər!” </li>
<br><br><li>Nə bilirsən (haradan bilirsən) ki, nədir o ayırd etmə günü?! </li>
<br><br><li>O gün vay halına (qiyaməti) yalan sayanların! </li>
<br><br><li>Məgər Biz əvvəlkiləri (keçmiş kafir ümmətləri) məhv etmədikmi?! </li>
<br><br><li>Sonra axırda gələnləri (Məkkə müşriklərini) də onlara qatacağıq. </li>
<br><br><li>Biz günahkarlarla belə rəftar edirik. </li>
<br><br><li>O gün vay halına (qiyaməti) yalan sayanların! </li>
<br><br><li>Məgər sizi bir qətrə zəif (dəyərsiz) sudan (nütfədən) yaratmadıqmı?! </li>
<br><br><li>Biz onu möhkəm bir yerdə (ana bətnində) saxladıq, </li>
<br><br><li>Müəyyən bir vaxta qədər. </li>
<br><br><li>Biz (nütfədən insan yaratmağa) qadir olduq. Nə gözəl qadir olanlarıq Biz! </li>
<br><br><li>O gün vay halına (qiyaməti) yalan sayanların! </li>
<br><br><li>Məgər Biz yeri məskən etmədikmi </li>
<br><br><li>Həm dirilərə, həm də ölülərə?! (Yerin altında ölülər yatar, üstündə dirilər gəzib-dolanar). </li>
<br><br><li>Biz orada möhkəm durmuş uca dağlar yaratdıq və sizə şirin su içirtdik. </li>
<br><br><li>O gün vay halına (bu nemətləri) yalan sayanların! </li>
<br><br><li>(O gün kafirlərə belə deyiləcəkdir: ) “Girin (dünyada) yalan hesab etdiyiniz (cəhənnəm əzabının) içinə! </li>
<br><br><li>Girin (cəhənnəm tüstüsünün) üç qola ayrılmış kölgəsinə!” </li>
<br><br><li>O (sizə) nə kölgəlik olar, nə də (sizi) alovdan qoruyar. </li>
<br><br><li>O (hər biri) bir saray boyda qığılcımlar saçar. </li>
<br><br><li>O (qığılcımlar), sanki sarı dəvə sürükləridir. </li>
<br><br><li>O gün vay halına (qiyaməti) yalan sayanların! </li>
<br><br><li>Bu elə bir gündür ki, (qiyaməti yalan sayanlar) danışa bilməzlər. </li>
<br><br><li>Onlara üzr istəməyə izin də verilməz. </li>
<br><br><li>O gün vay halına (qiyaməti) yalan sayanların! </li>
<br><br><li>Bu sizi də, (sizdən) əvvəlkiləri də bir yerə topladığımız (haqla batili) ayırd etmə günüdür! </li>
<br><br><li>(Dünyada etdiyiniz kimi, bu günün əzabından qurtarmaq üçün) bir hiyləniz varsa, Mənə qarşı qurun görək! </li>
<br><br><li>O gün vay halına (qiyaməti) yalan sayanların! </li>
<br><br><li>Həqiqətən, (o gün) müttəqilər kölgəliklərdə və çeşmələr başında, </li>
<br><br><li>İstədikləri meyvə içində olacaqlar! </li>
<br><br><li>(Onlara belə deyiləcəkdir: ) “(Dünyada) etdiyiniz (yaxşı) əməllərə görə nuşcanlıqla yeyin-için! </li>
<br><br><li>Biz yaxşı əməl sahiblərini belə mükafatlandırırıq!” </li>
<br><br><li>O gün vay halına (qiyaməti) yalan sayanların! </li>
<br><br><li>(Siz ey kafirlər!) Yeyin və (dünyada) bir az kef çəkin. Həqiqətən, siz günahkarlarsınız! (Axirətdə qismətiniz Cəhənnəmdir!) </li>
<br><br><li>O gün vay halına (qiyaməti) yalan sayanların! </li>
<br><br><li>Onlara: “Namaz qılın!” – deyildiyi zaman namaz qılmazlar! </li>
<br><br><li>O gün vay halına (qiyaməti) yalan sayanların! </li>
<br><br><li>(Bu kafirlər) ona da (Qurana da) inanmayandan sonra daha hansı kəlama inanacaqlar?! </li>
</ol>
