﻿<center>.69. <br>
əl-Haqqə (Haqq olan qiyamət) surəsi <br>
<b>(Məkkədə nazil olmuşdur, 52 ayədir) </b><br>
Bismillahir–rəhmanir-rəhim! <br></center>

<ol>
<li>Haqq olan qiyamət! </li>
<br><br><li>Nədir qiyamət?! </li>
<br><br><li>Nə bilirsən (haradan bilirsən) ki, nədir qiyamət?! (Qiyamətin nə olduğunu sənə nə öyrətdi?) </li>
<br><br><li>Səmud da, Ad da (ürəkləri dəhşətə salan) o qiyaməti yalan saymışdılar! </li>
<br><br><li>Səmud (qövmü) hədsiz dərəcədə dəhşətli (tükürpədici) səslə həlak edildi. </li>
<br><br><li>Ad (qövmü) isə uğultulu, çox (soyuq və) şiddətli bir küləklə tar-mar oldu. </li>
<br><br><li>Allah o küləyi yeddi gecə, səkkiz gün ardı-arası kəsilmədən onların üstünə əsdirdi. Belə ki, (əgər yanlarında olsaydın) sən onları orada yıxılıb ölmüş görərdin. Onlar, sanki içi bomboş xurma kötükləri idilər. </li>
<br><br><li>İndi sən onlardan heç bir əsər-əlamət görə bilərsənmi?! </li>
<br><br><li>Firon da, ondan əvvəlkilər də, alt-üst olmuş Mötəfikə əhli (Lut qövmü) də günah (xəta) törətmişdilər. </li>
<br><br><li>Onlar Rəbbinin peyğəmbərinə asi olmuş, O da onları şiddəti getdikcə artan bir əzabla yaxalamışdı. </li>
<br><br><li>Həqiqətən, hər tərəfi su basdığı zaman (Nuhun tufanı qopduqda) sizi gəmiyə Biz daşıdıq. </li>
<br><br><li>Ona görə ki, bunu (möminlərə nicat verib kafirləri məhv etməyimizi) sizə bir ibrət dərsi edək və dərk edən (öyüd-nəsihəti cani-dildən dinləyən) qulaq bunu eşidib yadda saxlasın! </li>
<br><br><li>Sur bircə dəfə üfürüləcəyi; </li>
<br><br><li>Yer və dağlar qaldırılıb bircə dəfə bir-birinə çırpılacağı (əzilib toza dönəcəyi) zaman - </li>
<br><br><li>Məhz o gün (vaqe olacağına heç bir şübhə olmayan) qiyamət qopacaqdır! </li>
<br><br><li>Və (göy) süst düşüb parçalanacaqdır! </li>
<br><br><li>Mələklər də onun (göyün) ətrafında (Allahın əmrinə müntəzir) olacaq və həmin gün (ya Peyğəmbər!) sənin Rəbbinin ərşini onların (başı) üstündə səkkiz mələk daşıyacaqdır! </li>
<br><br><li>O gün (ey insanlar!) siz (haqq-hesab üçün Rəbbinizin hüzuruna) gətiriləcəksiniz. Sizin heç bir sirriniz (Allahdan) gizli qalmayacaqdır! </li>
<br><br><li>Əməl dəftəri sağ əlinə verilən kimsə deyəcəkdir: “Alın, əməl dəftərimi oxuyun! </li>
<br><br><li>Mən (dünyada ikən qiyamət günü) öz hesabıma yetişəcəyimə (möhkəm) inanmışdım!” </li>
<br><br><li>Bundan belə o, xoş güzəran içində, </li>
<br><br><li>Yüksək bir Cənnətdə olacaqdır. </li>
<br><br><li>(Elə bir Cənnət ki, onun) meyvələri çox yaxındadır (möminlər onlardan ayaq üstə olanda da, oturanda da, uzananda da yeyə biləcəklər). </li>
<br><br><li>(Onlara belə deyiləcəkdir: ) “Keçmiş günlərdə etdiyiniz (yaxşı) əməllər müqabilində yeyin-için!” </li>
<br><br><li>Əməl dəftəri sol əlinə verilən isə deyəcəkdir: “Kaş əməl dəftərim mənə verilməyəydi! </li>
<br><br><li>Hesabımın nə olduğunu bilməyəydim! </li>
<br><br><li>Kaş o (ölüm) qəti (əbədi) olaydı! (Bir daha dirilib bu əzabı görməyəydim!) </li>
<br><br><li>Mal-dövlətim mənə heç bir fayda vermədi (Allahın əzabını məndən dəf edə bilmədi). </li>
<br><br><li>Mülküm (səltənətim) də məhv olub getdi!” </li>
<br><br><li>(Allah dərgahından belə bir nida gələcəkdir: ) “Onu tutub qandallayın! </li>
<br><br><li>Sonra da Cəhənnəmə atın! </li>
<br><br><li>Daha sonra onu yetmiş arşın uzunluğunda zəncirlə bağlayın! </li>
<br><br><li>Çünki o, böyük olan Allaha inanmırdı. </li>
<br><br><li>O (özü zəkat vermir, acizə, kimsəsizə kömək etmir, xalqda da) yoxsulu yedirtməyə rəğbət oyatmırdı. </li>
<br><br><li>Bu gün bax burda onun yaxın bir dostu yoxdur. </li>
<br><br><li>İrindən başqa bir yeməyi də yoxdur. </li>
<br><br><li>Onu ancaq günahkarlar yeyər!” </li>
<br><br><li>And içirəm gördüklərinizə, </li>
<br><br><li>Və görmədiklərinizə ki, </li>
<br><br><li>Bu (Quran) çox möhtərəm bir elçinin (Cəbrailin, yaxud Muhəmməd əleyhissəlamın Allahın ona nazil etdiyi) sözüdür! </li>
<br><br><li>O, şair sözü deyildir! Nə az inanırsınız! </li>
<br><br><li>O, kahin sözü də deyildir! Nə az düşünürsünüz! </li>
<br><br><li>O, aləmlərin Rəbbi tərəfindən nazil edilmişdir. </li>
<br><br><li>Əgər o (Peyğəmbər) özündən bəzi sözlər uydurub Bizə isnad etsəydi, </li>
<br><br><li>Biz ondan mütləq şiddətli intiqam alardıq (sağ əlini kəsərdik, yaxud boynunu vurardıq)! </li>
<br><br><li>Sonra onun şah damarını qopardardıq! </li>
<br><br><li>Və heç biriniz də (Bizim əzabımızı) ondan dəf edə bilməzdiniz. </li>
<br><br><li>Şübhəsiz ki, bu (Quran) müttəqilərə bir öyüd-nəsihətdir. </li>
<br><br><li>(Ey insanlar!) İçərinizdə onu yalan hesab edənlər olduğunu da, əlbəttə, bilirik. </li>
<br><br><li>Şübhəsiz ki, bu (Quran) kafirlər üçün bir peşmançılıqdır (ona inanmadıqlarına görə qiyamət günü böyük zərər çəkəcəklər). </li>
<br><br><li>Doğrudan da, bu (Quran) gerçək bir həqiqətdir. </li>
<br><br><li>Elə isə (ya Peyğəmbər!) sən ulu olan Rəbbinin adını təsbih (müqəddəs tutub həmd-səna ilə zikr) et! </li>
</ol>