﻿<center>.56. <br>
əl-Vaqiə (Vaqiə) surəsi <br>
<b>(Məkkədə nazil olmuşdur, 96 ayədir) </b><br>
Bismillahir–rəhmanir-rəhim! </center>

<ol>
<li>Qiyamət vaqe olacağı (qopacağı) vaxt </li>
<br><br><li>Onun vaqe olmasını heç kəs təkzib edə (dana) bilməz! </li>
<br><br><li>O (kimini) alçaldacaq, (kimini də) ucaldacaqdır. </li>
<br><br><li>Yer hərəkətə gəlib şiddətlə titrədiyi, </li>
<br><br><li>Dağlar parça-parça olub ovxalandığı </li>
<br><br><li>Və toz kimi səpələndiyi zaman </li>
<br><br><li>Siz (ey insanlar!) üç zümrəyə ayrılacaqsınız: </li>
<br><br><li>Sağ tərəf sahibləri (əməl dəftərləri sağ əllərinə verilənlər). Kimdir o sağ tərəf sahibləri? (Nə uğurludur onlar!) </li>
<br><br><li>Sol tərəf sahibləri (əməl dəftərləri sol əllərinə verilənlər). Kimdir o sol tərəf sahibləri? (Nə uğursuzdur onlar!) </li>
<br><br><li>Və öndə olanlar. Onlar (dünyada Allah yolunda, imanda, əməldə, xeyirdə öndə olduqları kimi, axirətdə də) öndədirlər! (Nə xoşbəxtdir onlar!) </li>
<br><br><li>Onlar (Allah dərgahına, Allahın lütfünə) yaxınlaşdırılmış kimsələrdir. </li>
<br><br><li>Onlar Nəim cənnətlərində olacaqlar. </li>
<br><br><li>(Öndə olanların) çoxu əvvəlkilərdən (keçmiş peyğəmbərlərin ümmətlərindən), </li>
<br><br><li>Biz azı da axırıncılardandır (Muhəmməd əleyhissəlamın ümmətindəndir). </li>
<br><br><li>(Onlar qızıl-gümüş, ləl-cavahiratla) bəzənmiş taxtlar üstündə qərar tutacaq, </li>
<br><br><li>Onlara (o taxtlara) söykənib bir-biri ilə qarşı-qarşıya əyləşəcəklər. </li>
<br><br><li>Onların dövrəsində həmişəcavan xidmətçi oğlanlar dolanacaqlar; </li>
<br><br><li>(Cənnət bulağından axan) məin (şərab) dolu piyalələr, kuzələr və qədəhlərlə. </li>
<br><br><li>(Dünyadakı şərabdan fərqli olaraq) ondan başları ağrımaz və keflənməzlər. </li>
<br><br><li>(O cavan xidmətçilər Cənnətdə olanların) bəyənib seçdikləri meyvələr </li>
<br><br><li>Və istədikləri hər cür quş əti ilə (onların dövrəsində fırlanacaqlar). </li>
<br><br><li>(Onlar üçün orada) iri (ahu) gözlü, qəşəng hurilər də vardır. </li>
<br><br><li>(O hurilər rəng və gözəllikcə) sanki sədəf içində gizlənmiş (qorunub-saxlanmış) incidirlər. </li>
<br><br><li>Onlar (bu nemətlərə dünyada) etdikləri (yaxşı) əməllər müqabilində nail olacaqlar. </li>
<br><br><li>Onlar orada (Cənnətdə) nə boş söz, nə də günaha bais olan bir şey eşidəcəklər. </li>
<br><br><li>Eşitdikləri söz ancaq “salam” olacaqdır. </li>
<br><br><li>Sağ tərəf sahibləri! (Əməl dəftərləri sağ əllərində olanlar!) Kimdir o sağ tərəf sahibləri? </li>
<br><br><li>(Onlar) tikansız sidr ağacları, </li>
<br><br><li>Salxım-salxım sallanmış möüz (banan) ağacları altında; </li>
<br><br><li>Çəkilməyən (daimi) kölgəliklərdə; </li>
<br><br><li>Axar su kənarında; </li>
<br><br><li>Bol meyvələr – </li>
<br><br><li>Tükənməz və qadağan edilməyən (meyvələr) içində </li>
<br><br><li>Və (bir-birinin üstünə yığılmış) hündür döşəklər üstündə (yaxud yüksək əxlaq və qeyri-adi gözəllik sahibi olan qadınlar yanında) olacaqlar! </li>
<br><br><li>Şübhəsiz ki, Biz onları (huriləri) başqa cür (yeni bir yaradılışla, doğulmadan) yaradacağıq! </li>
<br><br><li>Onları bakirə qızlar, </li>
<br><br><li>Ərlərini sevən, həmyaşıdlar edəcəyik. </li>
<br><br><li>Sağ tərəf sahibləri (əməl dəftəri sağ əllərinə verilənlər) üçündür onlar! </li>
<br><br><li>(Onların) bir çoxu əvvəlkilərdən (keçmiş peyğəmbərlərin ümmətlərindən), </li>
<br><br><li>Bir çoxu da axırıncılardandır (bu ümmətdəndir). </li>
<br><br><li>Sol tərəf sahibləri! (Əməl dəftərləri sol əllərinə verilənlər!) Kimdir o sol tərəf sahibləri? </li>
<br><br><li>(Onlar) səmum yeli (qızmar atəş) və qaynar su içində, </li>
<br><br><li>Qapqara duman kölgəsində olacaqlar! </li>
<br><br><li>(O kölgə başqa kölgələrdən fərqli olaraq) nə sərin, nə də xoşagələndir. </li>
<br><br><li>Onlar bundan əvvəl (dünyada) naz-nemət içində idilər. </li>
<br><br><li>Özləri də böyük günah içində (Allaha şərik qoşmaqla) israr edib dururdular. </li>
<br><br><li>Və belə deyirdilər: “Əcaba, biz öldükdən, toz-torpaq və sür-sümük olduqdan sonra, həqiqətən, yenidən dirildiləcəyikmi?! </li>
<br><br><li>Yaxud bizdən əvvəl gəlib-getmiş atalarımız da dirildiləcəklərmi?!” </li>
<br><br><li>(Ya Peyğəmbər!) De: “(Sizdən) əvvəlkilər də, sonrakılar da, </li>
<br><br><li>Məlum bir günün (qiyamət gününün) müəyyən bir vaxtında mütləq (məhşərə) cəm ediləcəklər. </li>
<br><br><li>Sonra, siz ey (haqq) yoldan azanlar, (haqqı) dananlar! </li>
<br><br><li>Şübhəsiz ki, zəqqum ağacından (onun meyvəsindən) yeyəcəksiniz, </li>
<br><br><li>Qarınlarınızı onunla dolduracaqsınız. </li>
<br><br><li>Üstündən də (sizə bərk yanğı gəldiyi üçün) qaynar su içəcəksiniz. </li>
<br><br><li>Özü də onu susuzluq xəstəliyinə tutulmuş (dəvə) kimi içəcəksiniz. </li>
<br><br><li>Bu onların haqq-hesab günündəki ziyafətidir. </li>
<br><br><li>(Ey kafirlər!) Biz sizi (yoxdan) yaratdıq. Məgər (qiyamət günü yenidən dirildiləcəyinizi) təsdiq etməzmisiniz? </li>
<br><br><li>Bəs (bətnlərə) axıtdığınız nütfəyə nə deyirsiniz? </li>
<br><br><li>Ondan (insan) yaradan sizsiniz, yoxsa Biz?! </li>
<br><br><li>Sizin aranızda ölüm (kimin nə vaxt öləcəyini) əvvəlcədən Biz müəyyən etdik. Və Biz əsla aciz (önünə keçilməsi mümkün olan) deyilik, </li>
<br><br><li>(Sizi yox edib) yerinizə sizin kimiləri gətirməkdən (sizi başqaları ilə əvəz etməkdən) və sizi özünüz də bilmədiyiniz başqa bir şəkildə yaratmaqdan! </li>
<br><br><li>And olsun ki, siz ilk yaradılış (dünyaya necə gəldiyinizi) bilirsiniz. Elə isə (sizi yenidən diriltməyə qadir olduğumuz barədə) heç düşünmürsünüz?! </li>
<br><br><li>Bəs əkdiyiniz (toxuma) nə deyirsiniz? </li>
<br><br><li>Onu bitirən sizsiniz, yoxsa Biz?! </li>
<br><br><li>Əgər Biz istəsəydik, onu bir saman çöpünə döndərər, siz də mat-məəttəl qalıb: </li>
<br><br><li>“Biz ziyana uğramış, </li>
<br><br><li>Bəlkə, (hələ ruzidən də) məhrum olmuş kimsələrik!” (deyərdiniz). </li>
<br><br><li>Bəs içdiyiniz suya nə deyirsiniz? </li>
<br><br><li>Onu buluddan endirən sizsiniz, yoxsa Biz?! </li>
<br><br><li>Əgər istəsəydik, onu acı (bir su) edərdik. Elə isə niyə (Allahın nemətlərinə) şükür etmirsiniz? </li>
<br><br><li>Bəs (yaş ağacdan) yandırdığınız oda nə deyirsiniz? </li>
<br><br><li>Onun ağacını yaradan sizsiniz, yoxsa Biz? </li>
<br><br><li>Biz onu (sizi cəhənnəm odu ilə qorxutmaqdan ötrü) ibrət dərsi və səhrada olan müsafirlərin faydalanması üçün yaratdıq. </li>
<br><br><li>Belə olduqda (ya Peyğəmbər!) sən ulu olan Rəbbinin adını müqəddəs tutub zikr et! </li>
<br><br><li>Ulduzların (bürclərdəki) mənzillərinə (yaxud doğub-batdığı yerlərə) and olsun ki – </li>
<br><br><li>Kaş bunun nə qədər böyük bir and olduğunu biləydiniz – </li>
<br><br><li>(Sizə oxunan) bu (kəlam) çox qiymətli Qurandır. </li>
<br><br><li>(O, Allah dərgahında) qorunub saxlanılan bir Kitabdadır (lövhi-məhfuzdadır, yaxud lülələnib bükülmüş kağızlardadır). </li>
<br><br><li>Ona yalnız pak olanlar toxuna bilər! </li>
<br><br><li>(O) Aləmlərin Rəbbi tərəfindən nazil edilmişdir. </li>
<br><br><li>İndi siz bu kəlamı yalan sayırsınız? (Bu sözümə məhəl qoymursunuz?) </li>
<br><br><li>Ruzinizə şükür etməli olduğunuz halda, onu yalanmı hesab edirsiniz? </li>
<br><br><li>(Can) boğaza yetişdiyi (ölüm gəlib çatdığı) zaman </li>
<br><br><li>Siz (ona) baxıb durursunuz (əlinizdən heç bir şey gəlmir). </li>
<br><br><li>Biz ona sizdən daha yaxınıq, amma siz (bunu) görmürsünüz! </li>
<br><br><li>Əgər sizdən (dediyiniz kimi, qiyamət günü əməllərinizə görə) haqq-hesab çəkilməyəcəksə, </li>
<br><br><li>Və əgər (“öləndən sonra heç bir dirilmə, haqq-hesab yoxdur” sözünü) doğru deyirsinizsə, bəlkə, (o çıxan canı) geri (bədənə) qaytarasınız?! </li>
<br><br><li>Amma əgər (ölən kimsə Allah dərgahına, Allahın lütf və mərhəmətinə) yaxın olanlardandırsa, </li>
<br><br><li>(Onu) rəhmət, gözəl ruzi (yaxud xoş ətirli çiçəklər) və Nəim cənnəti gözləyir! </li>
<br><br><li>Əgər o, sağ tərəf sahiblərindəndirsə (əməl dəftəri sağ əlinə verilənlərdəndirsə), </li>
<br><br><li>(Ona özü kimi olan yoldaşlarının dili ilə: ) “Sağ tərəf sahiblərindən sənə salam olsun!” (deyiləcəkdir). </li>
<br><br><li>Əgər (ölən kimsə Allahın ayələrini, möcüzələrini) yalan sayanlardan və yoldan azanlardandırsa, </li>
<br><br><li>(Ona) qaynar su ziyafəti veriləcək </li>
<br><br><li>Və özü də Cəhənnəmə atılacaqdır. </li>
<br><br><li>Şübhəsiz ki, bu, təkzibolunmaz həqiqətdir! </li>
<br><br><li>Elə isə (ya Peyğəmbər!) sən ulu olan Rəbbinin adını təsbih (müqəddəs tutub zikr) et! (Və ya: Sən Rəbbini o böyük adı ilə təsbih et!) </li>
</ol>