﻿<center>.52. <br>
ət-Tur (Dağ) surəsi <br>
<b>(Məkkədə nazil olmuşdur, 49 ayədir) </b><br>
Bismillahir–rəhmanir-rəhim! </center>

<ol>
<li>And olsun (Allahın Musa ilə danışdığı) Tur dağına; </li>
<br><br><li>And olsun yazılmış kitaba (Tövrata, Qurana, yaxud bütün ilahi kitablara) - </li>
<br><br><li>Açıq dəri üzərində (olan kitaba); </li>
<br><br><li>And olsun (mələklərin ibadət etdiyi) Beytülməmura; </li>
<br><br><li>And olsun yüksək tavana (uca göyə) </li>
<br><br><li>Və dolub daşan (alovlanan) dənizə ki, </li>
<br><br><li>Rəbbinin əzabı (Ya Peyğəmbər!) mütləq vaqe olacaqdır! </li>
<br><br><li>Onu heç kəs dəf edə bilməz! </li>
<br><br><li>O gün göy hərəkətə gəlib fırlanacaq (çalxalanacaq), </li>
<br><br><li>Dağlar yerindən qopub (havada toz kimi) oynayacaqdır. </li>
<br><br><li>O gün vay (peyğəmbərləri) yalançı hesab edənlərin halına! </li>
<br><br><li>O kəslər ki, (dünyada) yalana qurşanıb qəflət içində oynayarlar. </li>
<br><br><li>O gün onlar zorla cəhənnəm oduna sürüklənəcəklər. </li>
<br><br><li>(Onlara belə deyiləcəkdir: ) “Bu sizin (dünyada) yalan hesab etdiyiniz cəhənnəm odudur! </li>
<br><br><li>(Vəhyə, Qurana sehr dediyiniz kimi) bu da sehrdir, yoxsa (gözünüz qapanıb onun həqiqət olduğunu) görmürsünüz? </li>
<br><br><li>Yanın orada! İstər dözün, istər yox; sizin üçün eynidir (həmişəlik Cəhənnəmdə qalacaqsınız). Siz ancaq etdiyiniz əməllərin cəzasını çəkəcəksiniz!” </li>
<br><br><li>Müttəqilər isə, şübhəsiz ki, cənnətlər və nemətlər içində olacaqlar. </li>
<br><br><li>Rəbbinin onlara əta etdiyi nemətlərdən zövq (ləzzət) alacaqlar. Rəbbi onları cəhənnəm əzabından qorumuşdur. </li>
<br><br><li>(Onlara belə deyiləcəkdir: ) “(Dünyada) etdiyiniz yaxşı əməllərin müqabilində nuşcanlıqla yeyin-için; </li>
<br><br><li>Səf-səf düzülmüş taxtlara söykəndiyiniz halda!” Biz onları iri (ahu) gözlü hurilərlə evləndirəcəyik. </li>
<br><br><li>İman gətirib övladları imanla arxalarınca gedənlərin nəsillərini də (Cənnətdə) özlərinə qoşacağıq. Onların əməllərindən heç bir şey əskiltməyəcəyik. Hər kəs öz əməlinin girovudur! </li>
<br><br><li>Onları istədikləri meyvə və ətlə (bol-bol) təmin edəcəyik. </li>
<br><br><li>Onlar orada bir-birinə (şərab dolu) qədəh ötürəcəklər. Onda (cənnət şərabının xislətində dünyakından fərqli olaraq) nə lağlağılıq, nə də günaha təhrik vardır. </li>
<br><br><li>Onların ətrafında (xidmət üçün) özlərinə məxsus olan, sədəf içində gizlənmiş inci kimi gözəl oğlanlar dolanacaqlar. </li>
<br><br><li>Onlar (dünyada gördükləri işlər barəsində) bir-birindən hal-əhval tutmağa başlayacaqlar. </li>
<br><br><li>Və (söhbət əsnasında) belə deyəcəklər: “Biz bundan əvvəl (dünyada) ailəmiz içində olarkən (Rəbbimizin əzabından) qorxardıq. </li>
<br><br><li>Artıq Allah bizə mərhəmət buyurub (minnət qoyub) bizi cəhənnəm (səmum) əzabından qorudu. </li>
<br><br><li>Biz bundan əvvəl (dünyada) Ona ibadət edirdik. Şübhəsiz ki, O, (vədinə sadiq) kərəm sahibidir, rəhm edəndir!” </li>
<br><br><li>Elə isə (ya Peyğəmbər! Sən müşriklərə) öyüd-nəsihət ver. Sən öz Rəbbinin neməti (nübüvvət və islam dini) sayəsində nə kahinsən, nə də divanə! </li>
<br><br><li>Yoxsa onlar (sənin barəndə): “(O) şairdir. Biz (ruzigarın gərdişi nəticəsində) onun başına gələcək müsibəti (ölüb getməsini) gözləyirik!” – deyirlər. </li>
<br><br><li>De: “Gözləyin, mən də sizinlə birlikdə (sizin başınıza gələcək müsibəti) gözləyənlərdənəm!” </li>
<br><br><li>Yoxsa onların puç ağılları bunu (bu cür batil sözləri deməyi) onlara əmr edir? Xeyr, onlar azğın bir qövmdürlər. </li>
<br><br><li>Yoxsa onlar: “Onu (Quranı) özündən uydurdun!” - deyirlər. Xeyr, onlar (həsədləri, təkəbbürləri və inadları üzündən) iman gətirmirlər. </li>
<br><br><li>Əgər doğru deyirlərsə, qoy onlar bunun (bu Quran) kimi bir kəlam gətirsinlər! </li>
<br><br><li>Yoxsa onlar heç bir şeydən (xaliqsiz) yarandılar?! Yaxud onlar (öz-özlərini) yaradanlardır?! </li>
<br><br><li>Yoxsa göyləri və yeri yaratdılar?! Xeyr, onlar (Allaha) ürəkdən inanmırlar! </li>
<br><br><li>Yoxsa (ya Peyğəmbər) sənin Rəbbinin xəzinələri onlardadır?! Yaxud (hər şeyə) onlar hakimdirlər?! </li>
<br><br><li>Yoxsa onların üstünə çıxıb (vəhyi) dinlədikləri bir nərdivanı vardır?! Elə isə qoy onların (vəhyi) dinləyənləri açıq-aşkar bir dəlil gətirsinlər! </li>
<br><br><li>Yoxsa qızlar Onun (Allahın), oğlanlar isə sizindir?! </li>
<br><br><li>Yoxsa (ya Peyğəmbər! Risaləti təbliğ etdiyinə görə) sən onlardan bir ücrət (mükafat) istəyirsən və onlar ağır borc yükü altındadırlar?! </li>
<br><br><li>Yoxsa onlar qeybi bilir və (orada olanı) yazırlar?! (Qiyamətin, axirət həyatının olmadığını oradan öyrənib Muhəmməd əleyhissəlamla mübahisə edirlər?) </li>
<br><br><li>Yoxsa (ya Peyğəmbər! Sənə qarşı) bir tələ qurmaq istəyirlər? Amma kafirlər özləri o tələyə düşəcəklər! </li>
<br><br><li>Yoxsa onların Allahdan başqa bir tanrısı vardır? Allah bunların Ona qoşduqları şəriklərdən tamamilə uzaqdır! </li>
<br><br><li>Əgər onlar göyün bir parçasının (başlarına) düşdüyünü görsələr: “Bulud topasıdır!” – deyərlər (özlərinə əzab gəldiyinə inanmazlar). </li>
<br><br><li>Elə isə (dəhşətdən) sarsılıb karıxacaqları günə qovuşana qədər sən onları tərk et! </li>
<br><br><li>O gün hiylələri onlara heç bir fayda verməyəcəkdir (Allahın əzabını onlardan dəf edə bilməyəcək) və onlara heç bir kömək olunmayacaqdır. </li>
<br><br><li>Şübhəsiz ki, zalımları (kafirləri) hələ bundan başqa da (dünyada və qəbir evində) əzab gözləyir. Lakin onların əksəriyyəti (bunu) bilməz! </li>
<br><br><li>(Ya Peyğəmbər!) Sən öz Rəbinin hökmünə səbr et! Şübhəsiz ki, sən Bizim gözümüzün qabağındasan (himayəmiz altındasan). (Namaza) qalxdıqda Rəbbini həmd-səna ilə zikr et! </li>
<br><br><li>Gecənin bir vaxtında nə ulduzlar batandan sonra (dan yeri söküləndə, yaxud sübh çağı) da Allahı təqdis edib şəninə təriflər de! (Gün ərzində vacib və əlavə namazları qıl!) </li>
</ol>